na ho tu jis men vo dil bhi hai kya dil
nikamma dil bura dil bad-numa dil
buton ko de diya nam-e-khuda dil
‘sakha’ meri bhi kya himmat hai kya dil
uthe aghosh se jab dard uttha
hile pahlu se jab vo hil gaya dil
abhi kamsin hain rusvai ka dar hai
nahin lete kisi badnam ka dil
sungha kar nikhat-e-zulf-e-muambar
uda kar le gai bad-e-saba dil
phire mujh se to goya phir gaya bakht
badhe meri taraf to badh gaya dil
vahi kavish vahi sozish vahi dard
tira paikan hai goya mira dil
hamen bhi ranj-o-rahat ki khabar thi
hamare paas bhi tifli se tha dil
mire mahbub ke mahbub ho tum
fida huun dil pe main tum par fida dil
sambhal hi jaega insan hai yarab
pighal hi jaega patthar hai ya dil
‘sakha’ jo mujh pe guzregi sahunga
mire siine men hai itna bada dil
Leave a Reply