Musahibat Ka Koi Silsila Nahin Hai Kya

musāhibat kā koī silsila nahīñ hai kyā

kisī bhī shaḳhs se ab rābta nahīñ hai kyā

hazār logoñ se pūchhā sabhī haiñ nā-vāqif

yahāñ bhī tujh ko koī jāntā nahīñ hai kyā

tamām rishte farāmosh kar diye tū ne

ta.alluqāt se ab fā.eda nahīñ hai kyā

amīr-e-shahr se hai maslahat bajā lekin

hai baat sach to kaho hausla nahīñ hai kyā

zabān maiñ ne jo kholī to sab haiñ shashdar kyuuñ

tire ḳhilāf koī boltā nahīñ hai kyā

muāmalāt meñ sab taaq par rakheñge usuul

ḳhudā ke bande tujhe kuchh pata nahīñ hai kyā

Leave a Comment