Ghulam Rabbani Taban
ek tum hi nahin duniya men jafakar bahut
dil salamat hai to dil ke liye azar bahut
haa.e kya chiiz hai mahrumi-o-gham ka rishta
mil ga.e ziist ke har moḌ pe gham-ḳhvar bahut
yad-e-ahbab ki ḳhushbu se mahakti shamen
kuchh kaho hoti hain kambaḳht dil-azar bahut
ishq-e-avara kahan qaid-e-dar-o-bam kahan
be-navaon ke liye saya-e-divar bahut
dil ki raftar badal jaati thi avaz ke saath
yaad aata hai vo pairaya-e-guftar bahut
ek din vaqt bata.ega junun ki azmat
yuun to ham log hain rusva sar-e-bazar bahut
vo kashakash hai ki jiina bhi hai dubhar ‘taban’
ishq ma.asum bahut husn fusun-kar bahut
Leave a Reply