Main to Nahin Hun in Ke Jaisi Ye to uDna Jaane Hain

main to nahin huun in ke jaisi ye to uḌna jaane hain

ye jo sab ḳhush-rang parinde pinjre ke divane hain

baiTh zara aram se dil ki Dor mujhe suljhane de

uljhi uljhi dhaḌkan ke kamzor se taane baane hain

apni ḳhaak se duur sahi par sondhi hai hijrat ki dhuul

kahne do kahne vaalo ko duur ke Dhol suhane hain

sirf ghaḌi ki Tik-Tik sunna maut se pahle maut hai yaar

vaqt se aage baḌh kar dekho aage na.e zamane hain

ḳhud ko gale se lagaya dekha man angan barsat ke baad

dhuup si ankhen damak rahi hain bhige bhige shane hain

kis ko pata hai kitna vaqt lagega in ko bharne men

dard to baḌhta hi jaata hai lekin zaḳhm purane hain

ziist ki train men apne apne phone uTha.e gum-sum se

jaane pahchane raston par log sabhi anjane hain

tere dar par ‘sima’ ‘naqvi’ kyon aate hain roz ye sang

ik tu hi divani hai ya baaqi sab divane hain