Rais Amrohvi
muqarrebin men ramz-ashna kahan nikle
jo ajnabi the vahi apne raz-dan nikle
haram se bhaag ke pahunche jo dair-e-rahib men
to ahl-e-dair hamare mizaj-dan nikle
bahut qarib se dekha jo fauj-e-a.ada ko
to har qatar men yaran-e-mehrban nikle
qalandaron se mila muzhda-e-subuk-ruhi
jo bazm-e-hosh se nikle to sar-garan nikle
qabila-e-haram o qaum-e-dair o firqa-e-rind
hamare chahne vaale kahan kahan nikle?
sukut-e-shab ne sikhaya hamen saliqa-e-nutq
jo zakiran-e-sahar the vo be-zaban nikle
miyan-e-rah khaḌe hain is intizar men ham
ki gard-e-rah haTe aur karvan nikle
guman ye tha ki pas-e-koh bastiyan hongi
vahan ga.e to mazarat-e-be-nishan nikle
gire zamin pe jo haft asman se Takra ke
to har qadam pe yahan aur haft-ḳhvan nikle
ufuq se apne to dhundla sa ik ghubar uTha
phir is ke ba.ad sitaron ke karvan nikle
kabhi kabhi to har ik saans par hua mahsus
ki jaise qalib-e-atish-zada se jaan nikle
samajh raha tha zamana jinhen nufus-e-jamal
vo sirf chand nafas-ha-e-ḳhun-chakan nikle
kamal-e-shauq se chheḌa tha jin ko mutrib ne
vo raag saaz ke siine se nauha-ḳhvan nikle
‘ra.is’ hujra-e-tarik-jan ko khol to duun?
jo koi afat-e-qattala-e-jahan nikle
Leave a Reply