Talib Baghpati
ji bhi kuchh aisa jalaya hai ki ji janta hai
aap ne itna rulaya hai ki ji janta hai
yaad ban kar tiri ma.asum vafa ne zalim
dil pe vo naqsh biThaya hai ki ji janta hai
shauq-e-gustaḳh ne aksar tumhen barham kar ke
haa.e vo lutf uThaya hai ki ji janta hai
jab kabhi yaad dilaya hai taḳhayyul ne tumhen
is tarah yaad dilaya hai ki ji janta hai
itna afsana-e-furqat ko kiya ishq ne zabt
sirf ye dars paḌhaya hai ki ji janta hai
dars-e-ibrat hai mire dil ki tabahi ‘talib’
ḳhaak men aisa milaya hai ki ji janta hai
Leave a Reply