a.ankhon se main ne chakh liya mausam ke zahr ko
lekin vajud sah na saka us ke qahr ko
phenka tha kis ne sang-e-havas raat ḳhvab men
phir DhunDhti hai niind usi pichhle pahr ko
miTTi ke sab makan zamin-doz ho ga.e
naqshe men ab talash karo apne shahr ko
dariya-e-shab ka TuuT gaya hai sukut aaj
muddat ke ba.ad dekh ke kirnon ki nahr ko
saa.e ke saath vaqt ke dauḌa vo der tak
palkon men phir chhupa liya lamhon ke qahr ko
paimana-e-gulab ko honTon se chuum kar
muTThi men qaid kar liya ḳhushbu ki lahr ko
Leave a Reply