husn-e-be-mehr ko parva-e-tamanna kya ho
jab ho aisa to ilaj-e-dil-e-shaida kya ho
kasrat-e-husn ki ye shaan na dekhi na suni
barq larzan hai koi garm-e-tamasha kya ho
be-misali ke hain ye rang jo ba-vasf-e-hijab
be-naqabi par tira jalva-e-yakta kya ho
dekhen ham bhi jo tire husn-e-dil-ara ki bahar
is men nuqsan tira ai gul-e-rana kya ho
ham gharaz-mand kahan martaba-e-ishq kahan
ham ko samjhen vo havas-kar to beja kya ho
dil-farebi hai tiri bais-e-sad josh o kharosh
haal ye ho to dil-e-zar shakeba kya ho
raat din rahne lagi us sitam-ijad ki yaad
‘hasrat’ ab dekhiye anjam hamara kya ho
Leave a Reply