Muqaddar Mein Sahil Kahan Hai Miyan

muqaddar men sahil kahan hai miyan

miri naav be-badban hai miyan

jo barq-e-tapan se munavvar rahe

vahi ashiyan ashiyan hai miyan

kahan jaiye mai-kada chhod kar

yahi ek ja-e-aman hai miyan

abad tak mukammal na ho paegi

shab-e-gham ki ye dastan hai miyan

kahan paaon rakkhun pareshan huun

zamin surat-e-asman hai miyan

muqaddas sahi karobar-e-vafa

magar is men nuqsan-e-jan hai miyan

ajab phiki phiki si hai chandni

udaas aaj kyuun chandraman hai miyan

jahan dil ke badle men milta hai dil

vo duniya na jaane kahan hai miyan

nahin mujh se ‘abid’ vo kuchh khaas duur

faqat zindagi darmiyan hai miyan

Leave a Comment