Lamhe Shumar Zat Bhi Karne Nahin Diye

lamhe shumār zaat bhī karne nahīñ diye

puure ye vājibāt bhī karne nahīñ diye

pesh-e-nazar haiñ apne muqaddar kī talḳhiyāñ

un se mutālibāt bhī karne nahīñ diye

badle jo harf lafz ke ma.anī badal ga.e

mahfūz vāqi.āt bhī karne nahīñ diye

duniyā ke sānehāt ne dil ko rulā diyā

tahrīr hādsāt bhī karne nahīñ diye

mausam na.e the dil ke kañval kyuuñ na khul sake

kuchh ahd-e-iltifāt bhī karne nahīñ diye

miltī koī kalīd hī irfān-e-zāt kī

duniyā ne tajrabāt bhī karne nahīñ diye

Leave a Comment