Ba-Zahir Jo Nazar Aate Ho Tum Masrur Aisa Kaise Karte Ho

ba-zahir jo nazar aate ho tum masrur aisa kaise karte ho

batana to sahi virani-e-dil ka nazara kaise karte ho

tumhari ik ada to vaqa.i tarif ke qabil hai jan-e-man

main shashdar huun ki us ko pyaar itna be-tahasha kaise karte ho

suna hai log dariya band kar lete hain kuuze men hunar hai ye

magar tum munsifi se ye kaho qatre ko dajla kaise karte ho

hamari baat par vo kaan dharta hi nahin hai Taal jaata hai

tumhen kya kya nahin hasil kaho arz-e-tamanna kaise karte ho

ta.ajjub hai ta.alluq yaad rakhna aur phir aram se sona

agar us ko bhula paa.e nahin ab tak savera kaise karte ho

tumhari aah ka ye kaun sa andaz hai vazeh nahin hota

muamma ye nahin khulta ki tum dariya ko sahra kaise karte ho