Ba-Zahir Jo Nazar Aate Ho Tum Masrur Aisa Kaise Karte Ho

ba-zāhir jo nazar aate ho tum masrūr aisā kaise karte ho

batānā to sahī vīrāni-e-dil kā nazāra kaise karte ho

tumhārī ik adā to vāqa.ī tārīf ke qābil hai jān-e-man

maiñ shashdar huuñ ki us ko pyaar itnā be-tahāshā kaise karte ho

sunā hai log dariyā band kar lete haiñ kuuze meñ hunar hai ye

magar tum munsifī se ye kaho qatre ko dajla kaise karte ho

hamārī baat par vo kaan dhartā hī nahīñ hai Taal jaatā hai

tumheñ kyā kyā nahīñ hāsil kaho arz-e-tamannā kaise karte ho

ta.ajjub hai ta.alluq yaad rakhnā aur phir ārām se sonā

agar us ko bhulā paa.e nahīñ ab tak saverā kaise karte ho

tumhārī aah kā ye kaun sā andāz hai vāzeh nahīñ hotā

muamma ye nahīñ khultā ki tum dariyā ko sahrā kaise karte ho

Leave a Comment