Shaukat Pardesi
mujh ko jahan men koi dil-ara nahin mila
main ḳhud bhi apne gham ka shanasa nahin mila
apni talab ke apni gharaz ke mile hain log
meri talab ko dekhne vaala nahin mila
phirta raha huun ku-e-vafa men tamam umr
lekin kahin bhi koi shanasa nahin mila
mere uyuub par rahi har shaḳhs ki nigah
koi hunar ko dekhne vaala nahin mila
ḳhanjar-ba-kaf to log mile har jagah magar
marham-ba-dast koi masiha nahin mila
ye bhi hua ki main ne jo socha nahin hua
ye bhi hua ki dil ne jo chaha nahin mila
milne ga.e the raat ko ‘shaukat’ se ham magar
tha vo hujum-e-fikr men tanha nahin mila
Leave a Reply