Etibar Sajid
mujhe vo kunj-e-tanhai se akhir kab nikalega
akele-pan ka ye ehsas mujh ko maar dalega
kisi ko kya padi hai meri khatir khud ko zahmat de
pareshan hain sabhi kaise koi mujh ko sambhalega
abhi tarikh naami ek jadugar ko aana hai
jo zinda shahr aur ajsam ko patthar men dhalega
bas agle mod par manzil tiri aane hi vaali hai
mire ai ham-safar tu kitna mera dukh bata lega
sharik-e-ranj kya karna use taklif kya deni
ki jitni der baithega vahi baten nikalega
riha kar de qafas ki qaid se ghayal parinde ko
kisi ke dard ko is dil men kitne saal palega
Leave a Reply