mujhe udaas kar ga.e ho ḳhush raho
mire mizaj par ga.e ho ḳhush raho
mire liye na ruk sake to kya hua
jahan kahin Thahar ga.e ho ḳhush raho
ḳhushi hui hai aaj tum ko dekh kar
bahut nikhar sanvar ga.e ho ḳhush raho
udaas ho kisi ki bevafa.i par
vafa kahin to kar ga.e ho ḳhush raho
gali men aur log bhi the ashna
hamen salam kar ga.e ho ḳhush raho
tumhen to meri dosti pe naaz tha
isi se ab mukar ga.e ho ḳhush raho
kisi ki zindagi bano ki bandagi
mire liye to mar ga.e ho ḳhush raho
Leave a Reply