Mujhe Sahl Ho Gain Manzilen Wo Hawa Ke Rukh Bhi Badal Gae

mujhe sahl ho gaiin manzilen vo hava ke rukh bhi badal gae

tira haath haath men aa gaya ki charagh raah men jal gae

vo lajae mere saval par ki utha sake na jhuka ke sar

udi zulf chehre pe is tarah ki shabon ke raaz machal gae

vahi baat jo vo na kah sake mire sher-o-naghma men aa gai

vahi lab na main jinhen chhu saka qadah-e-sharab men dhal gae

vahi astan hai vahi jabin vahi ashk hai vahi astin

dil-e-zar tu bhi badal kahin ki jahan ke taur badal gae

tujhe chashm-e-mast pata bhi hai ki shabab garmi-e-bazm hai

tujhe chashm-e-mast khabar bhi hai ki sab abgine pighal gae

mire kaam aa gaiin akhirash yahi kavishen yahi gardishen

badhin is qadar miri manzilen ki qadam ke khaar nikal gae