Poet
suḳhan ko tuul na de apni ehtiyaj bata
uTha na dil ki koi baat kal pe aaj bata
khaḌa huun dar pe sarasimgi ke aalam men
vo mujh se puchh raha hai ki kam-kaj bata
mufahamat miri koshish supurdagi tira kaam
tu apne shahr-e-junun ka mujhe rivaj bata
ḳhud apne haath se apni uḌa chuka huun ḳhaak
ab aur kya ho mukafat-e-ehtijaj bata
kitab-e-dil ko main tartib de raha huun phir
hava-e-taza hai kaisa tira mizaj bata
vo gaah sho.ala hai ‘sahba’ to gaah shabnam hai
kahin pe dekha hai aisa bhi imtizaj bata
Leave a Reply