Zubair Rizvi
kabhi ḳhirad se kabhi dil se dosti kar li
na puchh kaise basar ham ne zindagi kar li
andheri raat ka manzar bhi ḳhuub tha lekin
tum aa ga.e to charaghon men raushni kar li
tumhara jism hai jaḌon ka sard sannaTa
hararton se kahan tum ne dosti kar li
huzur-e-dost ajab hadisa hua yaaro
har ek harf-e-shikayat ne ḳhud-kushi kar li
liye phire hain bahut tum ko dil ki galiyon men
is ek baat pe duniya ne dushmani kar li
har ek moḌ pe ḳhanjar-ba-kaf thi tanha.i
gharib-e-shahr ne ghabra ke ḳhud-kushi kar li
Leave a Reply