Umair Najmi
mujhe pahle to lagta tha ki zaati mas.ala hai
main phir samjha mohabbat ka.enati mas.ala hai
parinde qaid hain tum chahchahahaT chahte ho
tumhen to achchha-ḳhasa nafsiyati mas.ala hai
hamen thoḌa junun darkar hai thoḌa sukun bhi
hamari nasl men ik jiniyati mas.ala hai
baḌi mushkil hai bante silsilon men ye tavaqquf
hamare rabton ki be-sabati mas.ala hai
vo kahte hain ki jo hoga vo aage ja ke hoga
to ye duniya bhi koi tajrabati mas.ala hai
hamara vasl bhi tha ittifaqi mas.ala tha
hamara hijr bhi hai hadsati mas.ala hai
Leave a Reply