mujhe paḌho to paḌho meri dastan se alag
main gulsitan men bhi yuun huun ki gulsitan se alag
ho koi vasl ka lamha ki hijr ka aalam
hijab-e-shauq hua hai na darmiyan se alag
nuqush-e-sajda zamana kahan talash kare
miri jabin se juda tere astan se alag
ye jan-navaz bahut hai vo kam-se-kam jan-soz
bahar se hai shikayat juda ḳhizan se alag
hujum-e-dard-o-alam dil ke saath tha ‘nashtar’
ye karvan bhi hua mir-e-karvan se alag
Leave a Reply