mujhe mat batana
ki tum ne mujhe chhodne ka irada kiya tha
to kyuun
aur kis vajh se
abhi to tumhare bichhadne ka dukh bhi nahin kam hua
abhi to main
baton ke vaadon ke shahr-e-tilismat men
aankh par khush-gumani ki patti liye
tum ko pedon ke pichhe darakhton ke jhund
aur divar ki pusht par dhundne men magan huun
kahin par tumhari sada aur kahin par tumhari mahak
mujh pe hansne men masruf hai
abhi tak tumhari hansi se nabard-azma huun
aur is jang men
mera hathiyar
apni vafa par bharosa hai aur kuchh nahin
use kund karne ki koshish na karna
mujhe mat batana…..