lakdi ki do mezen hain ik lohe ki almari hai
ik shair ke kamre jaisi ham ne umr guzari hai
ek salaḳhon vaali khidki jhank rahi hai angan men
divaron par uupar niche ḳhvabon ki gul-kari hai
manzar manzar bhiig raha hai shahr ki ḳhali sadkon par
pakki nahr pe gaanv ke ghode ki top savari hai
pyaas bujhane aate hain dukh dard parinde raat gae
ḳhvab ka chashma phuta tha ankhon men ab tak jaari hai
sanduq purani yadon ka taala tod ke dekha to
ik resham ki shaal mili hai niile rang ki saari hai
vaqt mile to gul-daste ka haath pakad kar aa jaana
varna kahna kaam bahut hai aane men dushvari hai