Jo Rahon Ke Patthar the Kya Ho Gae Hain

jo rāhoñ ke patthar the kyā ho ga.e haiñ

shivāloñ meñ jā kar ḳhudā ho ga.e haiñ

ye kaisī huā chal rahī hai chaman meñ

ki shāḳhoñ se patte judā ho ga.e haiñ

jo kal tak the qātil vo gañgā nahā kar

sunā hai ki ab devtā ho ga.e haiñ

vo shāḳheñ bahā.eñ na kyuuñ ḳhuuñ ke aañsū

hare patte jin se judā ho ga.e haiñ

batā.e hameñ bāġhbāñ ki ye ‘panchhī’

nasheman se kyuuñ lāpata ho ga.e haiñ

Leave a Comment