Sardar Panchhi
jo rahon ke patthar the kya ho ga.e hain
shivalon men ja kar ḳhuda ho ga.e hain
ye kaisi hua chal rahi hai chaman men
ki shaḳhon se patte juda ho ga.e hain
jo kal tak the qatil vo ganga naha kar
suna hai ki ab devta ho ga.e hain
vo shaḳhen baha.en na kyuun ḳhuun ke aansu
hare patte jin se juda ho ga.e hain
bata.e hamen baghban ki ye ‘panchhi’
nasheman se kyuun lapata ho ga.e hain
Leave a Reply