mujhe malal bhi us ki taraf se hota hai
magar ye haal bhi us ki taraf se hota hai
main TuTta bhi huun aur ḳhud hi juḌ bhi jaata huun
ki ye kamal bhi us ki taraf se hota hai
pukarta bhi vahi hai mujhe safar ke liye
safar muhal bhi us ki taraf se hota hai
javab deta hai mere har ik saval ka vo
magar saval bhi us ki taraf se hota hai
vo mere haal se mujh ko hi be-ḳhabar kar de
ye ehtimal bhi us ki taraf se hota hai
main us ke hijr men kyuun TuuT kar nahin roya
ye ik saval bhi us ki taraf se hota hai
jab agahi mujhe gumrah karti hai ‘mohsin’
junun bahal bhi us ki taraf se hota hai
Leave a Reply