mujhe bacha bhi liya chhoḌ kar chala bhi gaya
vo mehrban pas-e-gard-e-safar chala bhi gaya
vagarna tang na thi ishq par ḳhuda ki zamin
kaha tha us ne to main apne ghar chala bhi gaya
koi yaqin na kare main agar kisi ko bata.un
vo ungliyan thiin ki zaḳhm-e-jigar chala bhi gaya
mire badan se phir aa.i ga.e dinon ki mahak
agarche mausam-e-barg-o-samar chala bhi gaya
hava ki tarah na dekhi miri ḳhizan ki bahar
khila ke phuul mira ḳhush-nazar chala bhi gaya
ajiib raushaniyan thiin visal ke us paar
main us ke saath raha aur udhar chala bhi gaya
kal us ne sair kara.i na.e jahanon ki
to ranj-e-narasi-e-bal-o-par chala bhi gaya
Leave a Reply