Abul Hasanat Haqqi
be-niyaz dahr kar deta hai ishq
be-zaron ko laal-o-zar deta hai ishq
kam-nihad-o-be-sabat insan men
jaane kya kya jama kar deta hai ishq
kaun jaane us ki ulti mantiqen
tuute hathon men sipar deta hai ishq
pahle kar deta hai sab aalam siyah
aur phir apni khabar deta hai ishq
jaan dena khelte hanste hue
qatl hone ka hunar deta hai ishq
kat giren aur phir bhi qaaem hain safen
kitne baazu kitne sar deta hai ishq
sar-barahna hain ana gumbad jo the
andhiyon se sau ko bhar deta hai ishq
dard-mandi par jo qaaem hon unhen
nur-afza chashm-e-tar deta hai ishq
ek bojhal raat kat jaane ke baad
ek lamhe ko sahar deta hai ishq
ye samajh tum ko bhi hogi sahibo
dil ko kyuun shoalon men dhar deta hai ishq
chal nikalne ka irada bandhiye
dekhiye samt-e-safar deta hai ishq
qadr hai jis ki khiyam-e-hur men
aabru ka vo guhar deta hai ishq
Leave a Reply