Etibar Sajid
muhtaj ham-safar ki masafat na thi miri
sab saath the kisi se rifaqat na thi miri
haq kis se mangta ki makinon ke saath saath
divar-o-bam-o-dar ko zarurat na thi miri
sach bol ke bhi dekh liya un ke samne
lekin unhen pasand sadaqat na thi miri
main jin pe mar mita tha vo kaghaz ke phuul the
rasmi mukalme the mohabbat na thi miri
jo dusron ke dukh the vahi mere dukh bhi the
kuchh aisi mukhtalif bhi hikayat na thi miri
bas kuchh usuul the jo ba-har-hal the aziiz
janam kisi se varna adavat na thi miri
Leave a Reply