tu zid se shab-e-vasl na aaya to hua kya
ham mar na ga.e dil ko kuḌhaya to hua kya
tasvir-e-nihali se ham-aghosh rahe ham
gar aa ke na saath apne sulaya to hua kya
dekha hi kiye tere tasavvur men qamar ko
gar ta-sahar ai yaar! jagaya to hua kya
phulon ki rahi sej jo ḳhali to bala se
angaron pe gar ham ko liTaya to hua kya
munh laal hua ghuncha-sifat ḳhun-e-jigar se
hathon se tire paan na khaya to hua kya
behtar ye hua nama-o-paigham se chhuTe
gar aap na aaya na bulaya to hua kya
dushman ka uḌane ko dhuan ye bhi bahut hain
ghairon ke sikhane se jalaya to hua kya
mar jaane se to ham rahe juun panja-e-marjan
haath apna jo mehndi se bandhaya to hua kya
tu aap hi dekh ungliyon ki fundaqen uudi
jamun ke jo paudon ko lagaya to hua kya
dekha hai bahut bhan-mati ka ye tamasha
sarson ko hatheli pe jamaya to hua kya
ham sarv-e-chaman dil ki har ik aah ko samjhe
apna qad-e-mauzun na dikhaya to hua kya
ham ne bhi mohabbat ko tiri taaq pe rakkha
abru jo su-e-ghair hilaya to hua kya
ye yaad rahe ham bhi nahin yaad karenge
gar tu ne hamen dil se bhulaya to hua kya
mina-ba-baghal abla-e-dil se rahe ham
jam-e-mai-e-agul-gun na pilaya to hua kya
dam aur hi ik dosti ka yaar bharenge
munh juun na.e quliyan na lagaya to hua kya
mat kah ki tasavvur men ḳhat-e-sabz ke mere
gar ‘shah’-nasir ashk bahaya to hua kya
hai dalne ko chhati pe tiri muung ḳhat-e-sabz
gar zahr-e-gham-e-hijr khilaya to hua kya
Leave a Reply