muddat se kisi Thahri hui ab-o-hava men
zinda huun yahan zahr bhari ab-o-hava men
achchha nahin lagta hai magar ai shab-e-hijran
tahlil to hona hai isi ab-o-hava men
us ko bhi na lag jaa.e kisi hijr ki dimak
ik vasl jo raushan hai tiri ab-o-hava men
jis haal men huun ye bhi mayassar nahin sab ko
maana ki vo lazzat na rahi ab-o-hava men
shadab nahin honge kabhi ḳhvab hamare
har chand ki raushan hain khuli ab-o-hava men
main apni taraf baḌhne laga aap hi ‘aḳhtar’
kya josh-e-aqidat tha na.i ab-o-hava men
Leave a Reply