mohabbat lazmi hai manta huun
magar ham-zad ab main thak gaya huun
tumhara hijr kandhe par rakha hai
na jaane kis jagah main ja raha huun
miri pahli kama.i hai mohabbat
mohabbat jo tumhen main de chuka huun
mire charon taraf ik shor sa hai
magar phir bhi yahan tanha khaḌa huun
koi to ho jo mere dard banTe
musalsal hijr ka maara hua huun
mohabbat, hijr, nafrat mil chuki hai
main taqriban mukammal ho chuka huun
Leave a Reply