mohabbat ki intiha chahta huun
unhen hasil-e-ibtida chahta huun
use barmala dekhna chahta huun
adab ai mohabbat ye kya chahta huun
gham-e-ishq ka silsila chahta huun
main tujh tak tira vasta chahta huun
karam-ha-e-na-mustaqil ka gila kya
sitam-ha-e-be-intiha chahta huun
vo ghabra ke jis par nazar Daal hi den
main vo qalb-e-shorish-ada chahta huun
karam kijiye to karam ka huun talib
saza dijiye to saza chahta huun
tiri yaad achchhi tarah zikr pyara
magar main tujhe dekhna chahta huun
tire ishq hi se bani meri hasti
tire ishq hi men miTa chahta huun
jo taaza kare qissa-e-tur ‘basit’
main aisa hi ik vaqi.a chahta huun
Leave a Reply