Mohabbat Ka Hoga Asar Rafta Rafta

Kunwar Mahendra Singh Bedi Sahar

mohabbat ka hoga asar rafta rafta

nazar se milegi nazar rafta rafta

shab-e-gham ki tulaniyon se na ghabra

ki is ki bhi hogi sahar rafta rafta

nazar un ki aise mili hai ki jaise

mila.enge dil bhi magar rafta rafta

qafas se riha.i to mil jaa.e pahle

nikal a.enge bal-o-par rafta rafta

miri bandagi ka karishma to dekho

jabin ban ga.i sang-e-dar rafta rafta

jahan ham kahin naqsh-e-pa chhoḌ aa.e

vahin ban ga.i rahguzar rafta rafta

mire saath jo do qadam bhi chala hai

vahi ban gaya ham-safar rafta rafta

ḳhuda jaane kyuun sar jhukane lage hain

mujhe dekh kar charagar rafta rafta

abhi us ne aane ka va.ada kiya hai

chamakne lage bam-o-dar rafta rafta

shab-e-gham ki rudad kya puchhte ho

‘sahar’ ko mili hai sahar rafta rafta