Kyun Aankh Se Surkhi Ab Chhalki Hui Lagti Hai

kyuun aankh se surkhi ab chhalki hui lagti hai

ye niind ki raani bhi ruthi hui lagti hai

yadon ka tasalsul hai ghanghor judai hai

savan ki tarah ye bhi chhai hui lagti hai

sujhe na mudava kyuun khud mere masiha ko

zakhmon ki tarah chahat risti hui lagti hai

avaz ye kis ne di phir yaad ye kaun aaya

be-tabi-e-dil kuchh kuchh sambhali hui lagti hai

guzri hai gulabon ko daman men khizan bhar ke

har shakh-e-chaman lekin mahki hui lagti hai

bazar-e-mohabbat ke tajir hain sitam-pesha

ai ‘bano’ tiri qimat lagti hui lagti hai

Leave a Comment