dil ko darun-e-ḳhana hi bahlao ghar raho
tum ko qasam hai bhiiḌ men mat jaao ghar raho
zinda rahe to yaar bahut mahfilen bahut
filhal mere anjuman-arao! ghar raho
maana ki iid milna bhi dastur hai magar
sinon se lag ke maut na phailao ghar raho
chaukhaT na paar karna ki bahar hai qatl-e-am
galiyon men chal rahi hai ajal daav ghar raho
mahbub ko bhi le ke maroge tum apne saath
gar ishq hai to ishq na jatlao ghar raho
dariya-e-ḳhun hai qariya-o-bazar men ravan
tah kar ke rakh do yaaro abhi naav ghar raho
ik mufti-e-saḳhi ka hai fatva ki Thiik hai
ghar rah ke chahe mai hi piye jaao ghar raho
faris! hamen bhi shauq-e-mulaqat hai magar
puure karenge ba.ad men sab chaav ghar raho
Leave a Reply