mohabbat hasil-e-duniya-o-din hai
mohabbat ruh-e-arbab-e-yaqin hai
nazar men jhuum uThti hain baharen
kisi ki yaad bhi kitni hasin hai
tasadduq ho rahe hain mah-o-anjum
nigahon men vahi zohra-jabin hai
kahan mumkin hai us ko bhuul jaana
ki har ik naqsh us ka dil-nashin hai
jahan chahun vahin mahfil saja luun
miri har ik nazar husn-afrin hai
vahi vo hain jidhar bhi dekhta huun
bas ab un ke siva koi nahin hai
zamana ho gaya us ik nazar ko
ḳhalish si aaj tak dil ke qarin hai
hua huun muddaton se ḳhud-faramosh
magar ye dil tujhe bhula nahin hai
sahara mil gaya jiine ka ‘muztar’
mujhe un ki mohabbat ka yaqin hai
Leave a Reply