Bana Degi Zamin Ko Aaj Shayad Aasman Barish

banā degī zamīñ ko aaj shāyad āsmāñ bārish

ki dho.e jā rahī haiñ ghar kī saarī khiḌkiyāñ bārish

na.e sadmāt kā sailāb aayā dil kī bastī meñ

nigal jaa.e na terī yaad kī ye kashtiyāñ bārish

khulī jo aañkh to chehre pe jagmag thī phuvāroñ kī

ki milne aa.ī thī kal raat mujh se nā-gahāñ bārish

badan se jab alag kartī ho tum bhīge hue kapḌe

chhamā-chham nāchtī hai jañgaloñ ke darmiyāñ bārish

‘salīm’ āñkhoñ se sahrāoñ kā ḳhālī-pan Tapaktā hai

mire andar barastī hai kahīñ ban kar dhuāñ bārish

Leave a Comment