Sardar Saleem
bana degi zamin ko aaj shayad asman barish
ki dho.e ja rahi hain ghar ki saari khiḌkiyan barish
na.e sadmat ka sailab aaya dil ki basti men
nigal jaa.e na teri yaad ki ye kashtiyan barish
khuli jo aankh to chehre pe jagmag thi phuvaron ki
ki milne aa.i thi kal raat mujh se na-gahan barish
badan se jab alag karti ho tum bhige hue kapḌe
chhama-chham nachti hai jangalon ke darmiyan barish
‘salim’ ankhon se sahraon ka ḳhali-pan Tapakta hai
mire andar barasti hai kahin ban kar dhuan barish
Leave a Reply