mohabbat ghair se ki hai to mera mudda.a le lo
mire dil pe guzarti kya hai is ka bhi maza le lo
jo kahta huun jafa.en chhoḌ do ahd-e-vafa le lo
to kahte hain ḳhuda se tum muqaddar dusra le lo
jo puchha chhoḌ duun ulfat to bole is se kya hoga
jo puchha apna dil le luun to jhunjhla kar kaha le lo
janab-e-ḳhizr rah-e-ishq men laḌne se kya hasil
main apna rasta le luun tum apna rasta le lo
shab-e-furqat jo dard-e-dil se ‘muztar’ dam ulajhta hai
qaza kahti hai ghabrao nahin mujh se dava le lo
Leave a Reply