abhishek-shukla

Mitti Se Mashwara Na Kar Pani Ka Bhi Kaha Na Man

mitti se mashvara na kar paani ka bhi kaha na maan

ai atish-e-darun miri pabandi-e-hava na maan

har ik lughat se mavara main huun ajab muhavara

miri zaban men padh mujhe duniya ka tarjuma na maan

zinda samaaton ka sog sunte kahan hain ab ye log

tu bhi sadaen deta rah mujh ko bhi be-sada na maan

ya to vo aab ho bahut ya phir sarab ho bahut

mitti ho jis ke jism men us ko mira khuda na maan

tuute hain mujh pe qahr bhi main ne piya hai zahr bhi

meri zaban-e-talkh ka itna bhi ab bura na maan

bas ek diid bhar ka hai phir to ye vaqfa-e-hayat

un ke qarib ja magar ankhon ki iltija na maan

More Poems

Leave a Comment