mitte hue nuqush-e-vafa ko ubhariye
chehron pe jo saja hai mulammaa utariye
milna agar nahin hai to zakhmon se faeda
chhup kar mujhe khayal ke patthar na mariye
koi to sarzanish ke liye aae is taraf
baithe hue hain dil ke makan men juvariye
hathon pe nachti hai abhi maut ki lakir
jaise bhi ho ye ziist ki baazi na hariye
shikva na kijiye abhi apne nasib ka
sanson ki tez aanch pe har shab guzariye
mismar ho gai hain falak-bos chahaten
shahar-e-jafa se ab na mujhe yuun pukariye
phulon se tazgi ki hararat ko chhin kar
mausam ke zahr ke liye gulshan sanvariye
rusvaiyon ka hoga na ab samna kabhi
jaldi se aarzu ko lahad men utariye
‘afzal’ ye tirgi ke musafir kahan chale
ji chahta hai in pe kai chand mariye