tah-ba-tah dariya ke sab asrar tak vo le gaya
lahr ik is paar se us paar tak vo le gaya
kaisa saaya tha ki gul ki us ne saari raushni
saath apne dhund ki divar tak vo le gaya
ek tha bimar qaidi ik gavah-e-chashm-did
ek hi zanjir ko darbar tak vo le gaya
tha charagh-e-iltija lekin bujha is shaan se
har muḳhatib se lab-e-iz.har tak vo le gaya
har sadaf men nuur ki thi buund sharma.i hui
ḳhalvaton se khinch kar bazar tak vo le gaya
Leave a Reply