Main Andheron Ka Pujari Hun Mere Pas Na Aa

maiñ añdheroñ kā pujārī huuñ mire paas na aa

apne māhaul se aarī huuñ mire paas na aa

rūp-mahloñ kī tū raanī hai tirā naam baḌā

maiñ to kaliyoñ kā bhikārī huuñ mire paas na aa

mirī āvāz ne kitne hī chaman phūñk diye

nāla-e-sub.h-e-bahārī huuñ mire paas na aa

rañj-o-ālām ke sahrāoñ meñ dariyā ban kar

maiñ baḌe zor se jaarī huuñ mire paas na aa

Thiik hai dost vahī huuñ maiñ tirā ‘rām’ magar

ab maiñ hālāt se aarī huuñ mire paas na aa

Leave a Comment