Tha Najm-E-Bakht-Tira Muqabil Tamam Raat

tha najm-e-baḳht-tira muqabil tamam raat

ankhon tale phira mire qatil tamam raat

harut saan zaqan men raha dil tamam raat

guzri miyana-e-chah-e-babil tamam raat

kis gul ne gul kiya tha miri sham-e-gor ko

tha qabr par hujum-e-anadil tamam raat

dhabba lage na rang-e-safed-o-siyah men

hai go tamam din ke muqabil tamam raat

raushan thi sub.h tak mire madfan pe sham-e-tur

roya khade khade mira qatil tamam raat

ai rashk-e-mehr-o-mah tire munh par nisar hai

suraj tamam din mah-e-kamil tamam raat

jaati thi yaad gesu o ruḳh men falak pe aah

mahtab tha asir-e-salasil tamam raat

karte hain gul jo chaak gareban tamam din

sunte hain nala-ha-e-anadil tamam raat

kahta tha ‘arsh’ sach men samajhta tha jhuut yaar

karta raha hai haq ko vo batil tamam raat

Leave a Comment