Hasan Shahnawaz Zaidi
misre ke vast men khaḌa huun
shayad main andha ho gaya huun
so.e hue biij jaag jaa.en
kheton men ashk bo raha huun
dahliz ke paas se kisi ke
phenke hue ḳhvab chun raha huun
bistar men raat so rahi hai
main tere huzur jagta huun
saari murda mohabbaton ko
hairat se chhu ke dekhta huun
TuuTi hui raqam ki tarah se
bekar men ḳharch ho gaya huun
bhula huun samundaron pe chalna
galiyon men Dubne laga huun
talvar par naqsh khod kar kya
qatil se daad chahta huun
bahrup badal liya hai tu ne
main bhi to tamasha ban gaya huun
Leave a Reply