misl-e-sahra hai rifaqat ka chaman bhi ab ke
jal bujha apne hi sho.alon men badan bhi ab ke
ḳhar-o-ḳhas huun to sharar-ḳheziyan dekhun phir se
aankh le aa.i hai ik aisi kiran bhi ab ke
ham to vo phuul jo shaḳhon pe ye sochen pahron
kyuun saba bhuul ga.i apna chalan bhi ab ke
manzilon tak nazar aata hai shikaston ka ghubar
saath deti nahin aise men thakan bhi ab ke
munsalik ek hi rishte men na ho jaa.e kahin
tire mathe tire bistar ki shikan bhi ab ke
be-gunahi ke libade ko utaro bhi ‘nasir’
raas aa jaa.e agar jurm-e-suḳhan bhi ab ke
Leave a Reply