Qamar Siddiqi
misal-e-ḳhvab hamesha kisi safar men rahe
ham apni niind men bhi us ki rahguzar men rahe
kisi ki yaad ke badal barasne vaale the
bahut ḳharab tha mausam so aaj ghar men rahe
tamam umr usi jism se shikayat thi
tamam umr usi jism ke khanDar men rahe
mata-e-dard ko aḳhir kahan kahan rakhte
so mere ganj-e-giran-maya-e-hunar men rahe
ye zindagi hai ‘qamar’ ya ki jangalon ka safar
har ek lamha yahan rah-e-pur-ḳhatar men rahe
Leave a Reply