Khalid Jamal
hai mol-bhao men bazar men hai saath mire
vo ek kar-e-fana-zar men hai saath mire
salib-e-jan se visal asman ke sahil tak
har ek lazzat-e-azar men hai saath mire
kabhi to hero banata hai aur kabhi joker
har ek rang ke kirdar men hai saath mire
yahi bahut hai mire jism o jaan ka hissa hai
kahin to mauja-e-ḳhun-bar men hai saath mire
ajab guman hai jaise ki sarfaraz huun main
ajiib fitna-e-dastar men hai saath mire
kabhi mujhe bhi zara mojaza-numa karta
jo apni zaat ke asrar men hai saath mire
vo dastaras men hai lekin nazar se gha.eb hai
harif-e-jan koi paikar men hai saath mire
main ik nigah ko mahsus kar raha huun mudam
koi to reg-e-fana-zar men hai saath mire
vo saare ḳheme lagata hai phir ukhaḌta hai
sarab-e-manzil-o-asar men hai saath mire
jo chhoḌ deta hai dasht-e-zaval men tanha
vo rel-pel men bazar men hai saath mire
Leave a Reply