Zia Jalandhari
kya sarokar ab kisi se mujhe
vasta tha to tha tujhi se mujhe
be-hisi ka bhi ab nahin ehsas
kya hua teri be-ruḳhi se mujhe
maut ki aarzu bhi kar dekho
kya ummiden thiin zindagi se mujhe
phir kisi par na e’tibar aa.e
yuun utaro na apne ji se mujhe
tera gham bhi na ho to kya jiina
kuchh tasalli hai dard hi se mujhe
kitna purkar ho gaya huun ki tha
vasta teri sadgi se mujhe
kar ga.e kis qadar tabah ‘ziya’
dushman andaz-e-dosti se mujhe
Leave a Reply