Mirza Ghaalib

fikr-e-insan par tiri hasti se ye raushan hua

hai par-e-murgh-e-taḳhayyul ki rasai ta-kuja

tha sarapa ruuh tu bazm-e-suḳhan paikar tira

zeb-e-mahfil bhi raha mahfil se pinhan bhi raha

diid teri aankh ko us husn ki manzur hai

ban ke soz-e-zindagi har shai men jo mastur hai

mahfil-e-hasti tiri barbat se hai sarmaya-dar

jis tarah naddi ke naghmon se sukut-e-kohsar

tere firdaus-e-taḳhayyul se hai qudrat ki bahar

teri kisht-e-fikr se ugte hain aalam sabza-var

zindagi muzmar hai teri shoḳhi-e-tahrir men

tab-e-goyai se jumbish hai lab-e-tasvir men

nutq ko sau naaz hain tere lab-e-ejaz par

mahv-e-hairat hai surayya rifat-e-parvaz par

shahid-e-mazmun tasadduq hai tire andaz par

ḳhanda-zan hai ghuncha-e-dilli gul-e-shiraz par

aah tu ujdi hui dilli men aramida hai

gulshan-e-vimar men tera ham-nava ḳhvabida hai

lutf-e-goyai men teri ham-sari mumkin nahin

ho taḳhayyul ka na jab tak fikr-e-kamil ham-nashin

haae ab kya ho gai hindostan ki sar-zamin

aah ai nazzara-amoz-e-nigah-e-nukta-bin

gesu-e-urdu abhi minnat-pazir-e-shana hai

shama ye saudai-e-dil-sozi-e-parvana hai

ai jahanabad ai gahvara-e-ilm-o-hunar

hain sarapa nala-e-ḳhamosh tere baam dar

zarre zarre men tire ḳhvabida hain shams o qamar

yuun to poshida hain teri ḳhaak men lakhon guhar

dafn tujh men koi faḳhr-e-rozgar aisa bhi hai

tujh men pinhan koi moti abdar aisa bhi hai

Leave a Comment