mili na fursat jahan ho ghash se uthi jo kuchh bhi naqab-e-ariz
magar samajhte nahin abhi tak tum apna jalva hijab-e-ariz
na dasht-e-aiman men zikr us ka na tuur hi par kabhi ye chamka
na ho nazar men jo tera jalva to mehr ko duun khitab-e-ariz
tasavvur un ka hai mujh ko har-dam na shab ko taskin na chain din ko
hoi hain auqat mere bilkul tabah kakul kharab-e-ariz
khushi ki kasrat agar ho un ko to ban ke ankhon men aaen aansu
ziyada yaan tak hain apni had se na thahre aariz men ab-e-ariz
ye rang-e-bazm-e-adu to dekho ki laakh parde kiye hain haail
naqab uthae vo go hain baithe magar hai ghairat hijab-e-ariz
ilahi meri jigar-fagari raqib sun kar unhen suna den
vo maslahat hi samajh ke aaen dikhane ko mahtab-e-ariz
nazar faza hai jahan hai jalva tumhara ehsan sab pe hoga
uthao aariz se tum jo parda to ghat na jaegi tab-e-ariz
ye naam jis ka qamar rakha hai mujhi se ik daagh le gaya hai
samajh to dekho samajh raha hai falak usi ko javab-e-ariz
kahin ilahi shab-e-judai tamam hone ko aa gai hai
numud-e-subh-e-jaza ho shayad ki main ne dekha hai khvab-e-ariz
hui ye hal-e-zabun ki shohrat ki us ne khajlat se munh chhupaya
bana hai rang-e-shikasta mera bahut dinon men naqab-e-ariz
na puchho ham se ki kya sabab hai siyah rozi ka apni ‘salik’
chamak raha hai bahut dinon se adu pe vo aftab-e-ariz
Leave a Reply