Zubair Qaisar
mile kuchh ishq men itna qarar kam-az-kam
hamare chehron pe aa.e nikhar kam-az-kam
suna.i dene lage us ki dhaḌkanon se sada
kisi se itna to ho ham ko pyaar kam-az-kam
ham apne ḳhvab ki ta.abir kuchh nikalen kya
ki ek lamha to ho pa.edar kam-az-kam
mire chaman men ḳhizan rakh chuki qadam lekin
mire ḳhayal ko milti bahar kam-az-kam
tamam umr ki naqadi men dekhiye sahab
do-char lamhe to hon ḳhush-gavar kam-az-kam
chuni vo rahguzar jis taraf nahin jaana
ho apne dil pe hamen iḳhtiyar kam-se-kam
ham us ki yaad ko rakh kar sirhane baiThe hain
kisi tarah to kaTe intizar kam-az-kam
ik-adh shaḳhs aziyyat-pasand hai lekin
tumhara hijr kare e’tibar kam-az-kam
Leave a Reply