Mile Jo Naqa-E-Wahshat Ko Sarban Koi

Shahida Hasan

mile jo naqa-e-vahshat ko sarban koi

dikhaun qafila-e-khvab ka nishan koi

khamoshiyon hi se mashrut hai janam mera

so meri raakh se uthta nahin dhuan koi

khasara aur hi hota tha be-ghari ka magar

mujhe makan men rakhta hai be-makan koi

kisi se hone na hone ke darmiyan ho jo rabt

vahin to rabt men aata hai darmiyan koi

suragh de ke mujhe meri be-zabani ka

mujhi men aan basa mujh sa be-zaban koi

tu mere aks ko mizan-e-aina men na tol

utha raha hai abhi meri kirchiyan koi

tire khayal ki abadiyan chhupati huun

ki mujh se chhin na le meri bastiyan koi